واحد من أكثر المواضيع اللي تواجه أي شخص يريد يشتري جهاز مخصص لبرامج التصميم والإظهار المعماري هو: "هل أشتري ماك بوك وأشتغل عليه كمعماري؟ لو لازم أشتري جهاز ويندوز؟" والجواب المختصر هو: ويندوز هو الخيار الأفضل للمعماريين. لكن الموضوع يستاهل شرح مفصّل، لأن السبب مو مجرد "رأي شخصي"، بل هي مشكلة تقنية حقيقية بأجهزة ماك تمنعها من تشغيل أغلب البرامج المعمارية بشكل صحيح.

لمّا تبحث بكوكل أو تشوف مراجعات على يوتيوب لأفضل اللابتوبات لصناعة المحتوى، راح تشوف أغلب الترشيحات تخلي الماك بوك على راس القائمة باعتباره جهاز بجودة تصنيع عالية، خفة الوزن، عمر بطارية طويل، نظام مستقر أكثر من ويندوز وأداءه عالي. وهذا صحيح، لكن بشرط إذا كان شغلك يعتمد فقط على صناعة المحتوى مثل تعديل الصور والمونتاج. ممكن تشغّل بعض البرامج المعمارية على الماك، لكن ما تكدر تعتمد عليه كجهاز أساسي بالشغل اليومي. وبهذا المقال راح أوضّح بالتفصيل البرامج اللي نشتغل عليها ومدى توافقها مع كل نظام.

كروت الشاشة مو بس قطعة هاردوير تعرض الصور على الشاشة، بل هي "معالج ذكي" متخصص بمعالجة الرسوميات والحسابات المعقدة اللي تحتاجها برامج الإظهار المعماري. ونفس فكرة معمارية المعالج اللي حجينا عنها قبل شوية، كروت الشاشة أيضاً عندها "لغة" خاصة فيها، وهاي اللغة تحدد شلون البرامج تتعامل مع الكرت وتستفيد من قوته.

أجهزة ماك أجهزة ممتازة بدون شك: جودة البناء رهيبة، الشاشة من أفضل الشاشات بالسوق، عمر البطارية خرافي، والنظام مستقر وسلس. المشكلة مو بالجهاز نفسه، المشكلة إنه ما يتوافق مع طبيعة شغلنا كمعماريين.